21 июлга ўтар кечаси ижтимоий тармоқларда Тошкент шаҳрининг Олмазор туманида "заҳарли газ" тарқалгани ҳақида хабарлар пайдо бўлди.
Ҳодиса гувоҳларининг айтишича, бир зумда бир неча кўчани тутунсимон газ қоплаб олган ва аҳолининг бир қисми ўз уйларини тарк этишга мажбур бўлган.
Бу тутун тумандаги корхонлардан бирининг омборидаги портлашдан сўнг содир бўлгани айтилади.
Тошкент шаҳрининг Олмазор туманида 21 июль куни кечаси фавқулодда ҳолат юз берди.
Ҳодиса гувоҳларининг айтишича, кечаси соат 12 яримларда туманнинг Узумбоғ кўчасини аста-секин тутунсимон заҳарли газ қоплашни бошлаган.
Телеграмда тарқалган видеоларда одамлар шаҳардаги ҳолатни кўрсатиб, хавотирда эканликларини билдиришди.
Узумбоғ кўчаси яқинида яшайдиган тошкентликлардан бирининг айтишича, бу ҳодисадан олдин иккита гумбурлаш овози эшитилган.
"Мен Узумбоғдан икки кўча берида яшайман. Лекин тутун бизга ҳам етиб келди. Соат 12 яримдан ошган эди. Синглим телефон қилиб ака ҳовлига чиқинг, деди. Чиқдим, булутсимон тутун қоплаб олган. Порохни ҳидига ўхшайди. Нафас олишим билан йўталишни бошладим. Дарҳол уйга кириб эшик-деразаларни ёпдим. Узумбоғда турадиган ўртоғим билан гаплашдим, у уйидагиларни бошқа жойга олиб кетибди. Эрталаб соат тўртларга бориб кейин йўқолди".
Шоҳидлардан бирининг айтишича, кўпчилик бу заҳарли газдан ўзини ёмон ҳис қилиб, тез ёрдамга мурожаат қилган. Айрим одамлар ярим кечаси машиналарда уйларини зудлик билан тарк этган.
Телеграм каналларида тарқалган хабарларда, Олмазор туманида жойлашган кимёвий моддалар сақланадиган омборда портлаш содир бўлиб, ёнғин чиққани ва омборда сақланаётган олтингугурт моддаси ёнишни бошлагани айтилади. Тутун ҳам айнан ўша ёнғиндан тарқалгани айтилмоқда.
Видеолардан бирида ўт ўчирувчиларнинг ёнғин чиққан жойга етиб келгани, лекин ўтни ўчирмаётгани айтилади. Видеода сўзлаётган одамнинг сўзларига кўра, химикатлар иссиқдан ёниб кетган.
Ўзбекистон Фавқулодда вазиятлар вазирлиги бу воқеа юзасидан 21 июль куни ўз интернет сайтида хабар қўйди. Бу хабарга кўра, Тошкент шаҳар ФВБга Олмазор тумани, Узумбоғ кўчасида ҳаводан олтин гугурт ҳиди келаётганлиги ҳақида хабар келиб тушган.
“Маълумотларга кўра омборхонада жойлашган сиғимдан перекис водород моддаси очиқ ҳавога сизиб чиқиши кузатилган. Тошкент шаҳар ФВБ Радиацион, кимёвий ва тиббий-биологик ҳимоя бўлимлари томонидан ушбу ҳолат соат 04:00 да тўлиқ бартараф этилди. Ҳозирда ҳолат юзасидан суриштирув ишлари олиб борилмоқда”.
Вазирлик хабарида ҳодиса қайси ташкилотда бўлгани ҳақида маълумот берилмаган.
Озодлик бунга аниқлик киритиш мақсадида ФВВ ахборот хизмати билан боғланди. Ахборот хизматининг Бекзод Абдурашидов исмли ходими 15 минутдан сўнг аниқлаб, маълумот беришини айтди.
Аммо, Бекзод Абдурашидов Озодликнинг бошқа қўнғироқларига жавоб бермади. Фавқулодда вазиятлар вазирлиги ўз хабарида қайси ташкилотнинг омборида бу ҳолат бўлганлигини кўрсатмагани сирли бўлиб қолмоқда.
Телеграм юлдузлари каналининг ёзишича, 21-июль куни Тошкент шаҳри, Олмазор туманида ҳавонинг ифлосланиш даражаси AQI 465 га етган.
AQI 465 — бу хавфсиз деб бўлмайдиган, балки тезкор ҳал этишни талаб қиладиган жуда хавфли категориядаги кўрсаткичдир.
| Жаҳон стандартлари бўйича бу ҳолатда жиддий хавф, барча инсонлар учун очиқ ҳаво нафас олиш саломатликка таҳдид пайдо бўлади. |
Перекис водород заҳарли газ эмас, лекин юқори концентрацияда (30% ва ундан юқори) — кўз, тери ва шиллиқ қаватларга зарар етказиши мумкин.
| Телеграм каналларида бу ҳодисага муносабат билдирган тошкентликлар, аҳолининг соғлигига жиддий хатар бўлганини ёзмоқда. |
2023 йилнинг 28 сентябрида Тошкентнинг Сергели туманидаги Interlogistics компаниясига тегишли омборхонада содир бўлган кучли портлашда, расмий маълумотга кўра, бир киши вафот этган, 163 киши турли даражада тан жароҳати олган эди.
Расмий маълумотларга кўра, қарийб 6 миллиард сўмлик талафот кўрилган.
Ҳукумат комиссияси омборхонада юз берган ёнғин ва портлашга катта миқдордаги кимёвий моддалар, қурилиш ва бошқа маҳсулотлар белгиланган талабларга риоя қилинмай, аралаш ҳолда сақлангани сабаб бўлганини маълум қилган эди. Суд портлашда айбдор деб топилганларни 5 йилданга озодликдан маҳрум қилган эди.
Форум